7 day free email guide in Hindi

Revision as of 16:39, 27 October 2021 by NottNott (talk | contribs) (→‎Parichay)
(diff) ← Older revision | Latest revision (diff) | Newer revision → (diff)
Jump to navigation Jump to search

Translated by Sharada from the EndMyopia Forum

Parichay

Din 1/7 Aankhein Bachaiye (guide ka prayog karke)

Hi,

Swaagat hai 7-din, 7-part guide mein, apni aankhon par niyantran paane ke liye.

Ek dashak pehle main -4.00 ka chashma pehnta tha aur mujhe bola gaya ki -5.00 ka pehno.

Mujhe high myopia tha. Kaafi sar dard hota tha, aankhein thaki-hui lagti thi, aur raat ke samay drishti naa ke baraabar thi. Iske bawajoot aaj meri drishti swabhavik tarah se 20/20 hai, bina koi surgery, koi lenses – aur koi sar dard yaa anya pareshani bhi nahi. Mujhe kaafi samay laga yahaan tak pahunchne mein. Myopia ki sachhai jaane ke baad, maine 1000s logon ki madat ki hai, unki aankhein theek karne mein, aur aaj yeh system (lagbhag) perfect hai.

Kya yeh tareeka aapke liye bhi kaam karega? Woh 100% aapke upar nirbhar hai. Yeh koi chutki bhar ka kaam nahi. Koi dawai nahi nigalni, naa hi koi jaadui lenses aankhon par lagaani. Yahi cheezon ne toh aapki aankhon ko museebat mein daala. Drishti sudharne mein prayaas lagega.

Pehle aapko seekhna hoga aankhein kaise kaam karti hain. Phir, yeh jaankaari ke baad, surakshit roop se, aap apna diopter kam kar sakte hain, screen time ghata sakte hain, aur dur ki drishti ko badhaa sakte hain, myopia nikalne ke liye.

7-din ke course mein hai:

Aaj: Myopia ki sachhai: Aapki aankhein kaise kaam karti hain

Din 2: Chashme aur kaise chaalaki se woh aapki aankhon mein parivartan laate hain (aur shayad hamesha ke liye unhe kharaab kar dete hain)

Din 3: Apna khudka Myopia Testing Lab kaise banaaye (kariban 10 rupees mein)

Din 4: Diopter numbers ek chupi kahaani batate hain (aur usse kaise samajhna)

Din 5: Sabse kharaab cheez jo aap apni aankhon ke saath roz kar rahe hain

Din 6: Tipniyaa Behtar Drishti ke liye

Din 7: Adhik jaankaari: 20/20 ka aage ka raasta chunna

Toh agar aap apna myopia sach mein theek karna chahte hain, yeh aanewale 7 dino ko, apni aankhon ke liye, sabse mahatvapurn banaiye. Agar aap har email achhi tarah se padenge, toh aap apni aankhon aur myopia ke baare lagbhag utni ya jyaada jaankaari rakhange jitniki licensed optometry professionals rakhte hain.

Samay mat vyarth kijiye. Sirf 7 emails hain 7 dino mein. Aage behtar drishti intezaar kar rahi hai. Tayyar hain phir?

[Din 1/7] Myopia ki sachhai: Aapki aankhein kaise kaam karti hain

Myopia samajhna

Drishti sudharne ke pehle, yeh jaana zaruri hai ki aankhein kaise kaam karti hain. Yeh eklauta tareeka hai jisse aap samjheinge mainstream optometrists ne aapko bewkoof kaise banaya. Yeh karne ke liye, hume clinical science samajhni hogi, toh dhairy rakhne ke liye anurodh.

Myopia 2 charanon mein hota hai, pehla jisse “pseudomyopia” bolte hain. Pseudomyopia - eye muscles, jo focus ko control karte hain, unme kshan-bhar-ka spasm (jakadan).

Aankh mein ek circular (gol aakaar) muscle hota hai jo lens ko control karta hai aur aakaar badalta hai, aapko saaf drishti dene ke liye – paas aur duri par. Yeh hai “ciliary” muscle. Jab aap duri par dekhte hain, toh muscle relaxed (vishraam) hota hai aur jab paas mein dekhte hain, toh muscle contract (jakkad) hojata hai. Jitna kareeb dekheinge, utna jyaada iss muscle ka contraction.

Lagbhag sabi ke liye, myopia ka pehla sanket sirf ciliary muscle ka spasm hota hai, bahut close-up focusing karne se. Yeh thode samay ke liye hota hai. Muscle lock up hojata hai aur lens kuch waqt tak “close-up” mode mein atak jaati hai . Iss wajah se, duri par saaf nahi dikhta. Yeh psuedomyopia hai – par aapko chasmon ki zarurat nahi hai isse theek karne ke liye.

Mere upar bharosa mat kijiye lekin. Dekhte hain yeh study American Academy of Optometry, jo 1998 mein publish hui thi, iss title se, “ Vision Therapy to Reduce Abnormal Nearwork-Induced Transient Myopia .”

Yeh study 5 logon ka, 7 se 10 hafton ka anubhav bayan karti hai, jinko Abnormal Nearwork-Induced Transient Myopia (ANITM) tha, jisme inhe vision therapy mila – aise upkaranon ka prayog hua jaise ki lens flippers aur Hart charts. ANITM jo hai “kam samay mein duri par cheezon ka dhundla hona, jiska sambandh hai kam samay ke liye pseudomyopia hona” choti avadhi ke paas ke kaam ke baad.

Yahi logon ki ANITM recordings li gayi, vision therapy ke pehle aur baad mein, Canon R-1 auto refractor ke saath, aur daily records bhi rakhe gaye. Study ke anusaar “therapy (chikitsa) ke baad, symptoms, clinical accommodative facility measures, aur objective findings mein kaafi sudhaar payaa gaya.”

Toh ab jab aapko pata hai vision therapy kaise kaam karti hai, yeh 2 cheezein hum kareinge:

1. Aapka myopia badne se rokna.

2. Aapke myopia ko reverse karna.

Aapka myopia rokna zaroori hai kyunki jitna zyaada myopia utna hi zyaada darr lattice degeneration ka (jiska lakshan hai bright light spots, ya “floaters” – ek bura sanket), retinal detachment, macular degeneration, aur bahut saari gambhir aankhon ki samasyaein. Par yeh toh sirf aadhi chunauti hai. Aap yahaan hai kyunki aapko aankhein theek karni hain. Aur woh kaise karni? aap puchenge. Iske liye aapko yeh e-mails padte rehna padega. Yaad hai, maine aapko bola tha prayaas karna padega. Behtar drishti ke liye koi aasaan tod nahi.

Jaane se pehle, main aapko ek aur cheez dena chahta hoon. Pehle maine aapko sankshipt mein bataya tha myopia kaise shuru hota hai, par zyaada jaankaari ke liye, jaise ki aankhein kaise kaam karti hain aur myopia kaise hota hai, yahan click kijiye. Yahan aapki aankhon aur myopia par sab kuch hai.

Linked page ke ant mein aur links hai baaki studies par. Dhyaan rakhiye, madhosh kar sakta hai, par agar aap sach mein jaanaa chahte hain vigyaan ko myopia ke baare mein kya pata hai aaj, toh ek jhalak daalni padegi.

Zyaada tayaari karna chahte hain iss hafte ke aankhon aur myopia ke shikshan par? Toh phir optometrist ki tarah apni drishti ka maap, diopters aur astigmatism ke saath, lena chahenge!

Khudse Drishti Maapne ke Auzaar

Khudka astigmatism maapne ka auzaar banayein, yeh guide ki sahayta se. Yahi page par aapko centimeter se diopter ka conversion bhi milega. Kaafi kuch hai, par aapko apni aankhon ki drishti ka maap ghar par karne milegi.

–> Kal, myopia pe clinical studies kaise dhundni Google par woh dekhte hain, myopia kaise shuru hua, aur bahut kuch aapko drishti sudhaar par le jaane ke liye!

Tab tak ke liye,

– Jake Steiner

[Din 2/7] Aapke Chashme, 100 Billion Dollarwalla Jhoot

Hi,

Kal humne baat ki thi myopia kaise hota hai, uske kaaran. Agar aapne jo link maine aapko diya tha woh pada, myopia 101 jo yahaan milega, toh aapne dekha hoga ki jo maine batlaya tha usse kaafi zyaada hai. Aaj ussi vishay pe charcha karenge.

Yaad hai maine bataya tha psuedomyopia ko theek karne ke liye chashmon ki zarurat nahi padegi? Zarurat nahi padti, lekin aamtaur par aise hi theek kiya jata hai.

Aapki praakrutik aankh duniya ki sabse parishkrut “auto-focus” tantr hai, jo khudse focus adjust karti hai, jab aap paas ki koi cheez dekhte hain, ya dur ki, ya bahut dur ki. Woh circular muscle lagataar khudko theek tarah se readjust karta rehta hai, ki roshni retina pe gire. Yeh ek gajab ki vyavastha hai jo lagataar aur turant focus ko adjust karti rehti hai.

Chashme, dusri or, itne adbhut nahi hain. Aapki aankhein focal plane gatisheel taur se badalti hain, par chashme sthir tareeke se karte hain. Chashme sirf ek adjustment karte hain, aur woh hai jo bhi diopter ka number jo aapko diya gaya hai. Chashme roshni ko zarur focus karte hain (focal plane) aankh ke andar, aapki praakrutik aankh ki tarah, par sirf ek nishchit duri ke liye.

Agar aap nearsighted hain, toh aapki “minus” lenses hongi. Yeh lenses roshni ko aankh ke andar aur dur focus karti hain. Yeh focusing muscle spasm ko dhyaan mein rakhkar hota hai, lekin jaise aapki aankhein lenses par nirbhar karne lagti hain, aankhein lambi hone lagti hain. Yeh ek bada vishay hai, “axial elongation” eyeball ka. Chikitsa vigyaan ne hazaaron panne likhe hain iski studies par.

Main aapko bata deta hoon. Aapki aankh koi bekaar sthir cheez nahi, jaisa aapka optometrist aapko bole, aapko khudi ki sthir lens correction dete samay. Balki — apne aap ko sambhal lijiye sunne se pehle — aapki aankh aakaar badalti hai aaju-baaju ke vatavaran ko dekhkar.

Jab aap shishu the, tabhi sambhavna hai aap farsighted the (aur shaayad astigmatism bhi tha). Phir aapki aankh adjust hui vatavaran ke prabhav se. Aapki drishti ne tai kiya aapki eyeball ki axial length (haalanki yeh kaafi jano ke liye hota hai). Yeh jaana zaruri hai ki aapki aankh vatavaran ke khilaaf khudse nahi kaam karti.

Jo aap dekhenge wohi aapko dikhega.

Agar aapne kabhi socha hai ki mera prescription kyun badta rehta hai har saal, toh yeh hai jawaab. Chikitsa vigyaan ne aapke badte hue myopia ke liye ek shabd bhi rakha hai: lens-induced myopia (matlab, jo lenses aap pehente hain, unhi ke kaaran hua myopia).

Iss vishay pe baar-baar khoj bhi ki hai ki, kya aisi koi jaati hai jiss par yeh laagu nahi hota. Par har jaanvar jisski aankh hum insaano jaisi hai, woh aise hi kaam karti hai. Machli ki aankh bhi lambi ho jaati hai agar uske samne minus lenses daali jaaye toh (mujhe mat puchiye yeh kaise pata chala). Bandar, murgi, sab kissi ki aankhein ande-jaisi ho jaati hain jab minus lenses ka upyog hota hai.

Agar yeh asambhav lag raha hai toh, Google Scholar jaiye (jahan aap chikitsa saahitya dhoond sakte hain) aur wahan type kijiye jo bhi shabd maine aapko bataye: pseudomyopia, axial elongation, lens-induced myopia, ityaadi.

Par ek minute ruk jaiye. Agar iss par itna anweshan hua hai, toh aapko abhi bhi chashme kyun beche jaa rahe hain? Apne optician ke paas bhagte hue mat jaana jawab mangne: Yeh koi nayi patented cheez nahi, koi brand nahi.

Mere tarike se shareholders utsaahit nahi honge. Badi company ke liye munaafa nahi hoga, isliye bikri-par-dhyaan-dene-walle yeh dukaanon ke paas koi wajah hi nahi sikhane, jaanne aur samagr tarikon ka abhyaas karne mein, drishti swasthya ke liye.

Ek aur chotti si cheez: Main pehle optometrists ke kaafi khilaaf tha, jaada karke kyunki main unhe dushman maanta tha. Unhone mujhe chashmon mein daala, nivaran ke badle. Unhone mere se bahut paisa banaya jabki meri aankhein aur bigadti gayi. Main kaafi gussa tha iss baare mein, kaafi saal tak.

Par pata hai kya? Optometrists dushman nahi hain. Woh wohi dete hain jo (jyaadatar) log chahte hain: turant saaf drishti, parinaam ki parvah naa karte hue. Aap, aap parinaam ki parvah karte hain. Toh wapas aa jaate hain aapki aankhon par.

Aap abb buniyaadi usool jante hai ki aapki aankh kaise kaam karti hai aur myopia kaise shuru hota hai. Sankshep mein, myopia ke yeh mul charan hain:

Aapka myopia ek muscle spasm hai. Bahut saara paas ka kaam aur yeh muscle “lock up” hojata hai close-up mode mein. Dur ki drishti zara si dhundli hojati hai.

Minus lenses ek taur ki therapy jaise hain. Woh roshni ko aur peche karte hain, aankh ke andar, muscle spasm ki kamee purti karte hain (par usse theek nahi karte).

Yehi minus lenses ki wajah se aankhein aur lambi hojati hain. Abb yeh correction itna zordar nahi (kareeban ek saal shuruaat se, ausatan = on average). Aur zordar correction ki zarurat padegi roshni ko peche karne mein, wohi aankh jo abb aur zyaada lambi hogayi hai.

Abb aap samjhe maine yeh tareeka kyun apnaya, mainstream optometry ke vikalp? Jo chashme aap pehen rahe hain sirf samasya badha rahe hain, samaadhaan nahi de rahe.

Retail optometry ki sabse badi behas yeh hai ki aapke badte hue myopia ka kaaran, axial length eyeball ka, woh aapke haath mein nahi hai. Yeh bilkul sachh nahi hai, sirf ek aasaan jhoot aapko aur chashme bechne ke liye. Yahan, yeh dekhiye iss clinical research par.

Bhaunchakit kar denewali baatein, hain na?

–> Kal hum seekheinge aapki aankhon ki drishti kaise maapna. Yeh ek bada kadam hai. Ek baar aap jaanle kaise karna, toh aap samajh lenge khudka lens correction utna hi behtar, aur naap sakeinge aapki aankhon par har roz ki thakaan.

Kal milte hain!

Cheers,

– Jake Steiner

[Din 3/7] Aankhein Theek Karein? Pehle, Aapka Myopia Maapte Hain

Hi,

(Nahi dekhi kal ki e-mail, “Aapke Chashme, 100 Billion Dollarwala Jhoot?” Yahaan padh sakte hain.)

Swaagat hai.

Taiyaar hain apni drishti maapne ke liye? Nashila kar denewali cheez hai. Iss e-mail ke baad, aap apni paas ki optic ki dukaan pehle jaise nahi dekheinge.

Baat yeh hai: Agar app maap sakte hain, toh aap uss par maatra theraa sakte hain; agar aap maap sakte hain, toh aapko pata chalega kya kya hai; agar aap maap sakte hain, toh aapko pata chal jayegaa aapko vakai kya chahiye, aur agar, shayad, bahut correction hai.

Ek badhiya aur bilkul aasaan tareeka hai apni drishti ko maapna, aur woh bhi Rs 10 ke ruler ke saath. Main aapko yahin batata hoon kaise.

(Agar aap apne measurements ke baare aur geharaayi mein jaanna chahte hain, toh aap ek eye chart print kar sakte hain aur test lens kit online order kar sakte hain. Par inke alawa bhi, aap apne sahi diopters jaan sakte hain, sirf woh Rs 10 wale ruler se.)

EK CHETAAVANEE: Kam diopterwale chashme aise hi mat khareed lena jab tak puri jaankari naa ho ki aap kya kar rahe hain. Main aapko prescription ki salaah nahi de raha. Main aapko medical salaah bhi nahi de raha. Main aapko sirf biology aur optics sikha raha hoon.

Abb chalo wapas uss ruler ke paas aur maap kaise lena.

Vastav mein, iss kaam ke liye measuring tape sabse achha hai—aapko pata hoga, jiska tailor istamaal karte hain (jo aapko saste mein dukaan ya Amazon se mil sakta hai). Aapko ruler ya tape ki zarurat padegi, aapki aankh se panne (ya screen) tak ki duri maapne mein.

Maap aise lena hai:

Apne chashme utaar lijiye.

Screen ya kitaab ko dekhiye (printed pages wali kitaab sabse achhi hai, iss kaam ke liye).

Shuruaat mein apne chehre ko kitaab ke kaafi paas rakhiye, jahan text ekdum saaf dikhe, aur phir dheere-dheere piche jaaiye tab tak jabki text zara si dhundli lage. Jab text aapko ekdum saaf naa nazar aaye aur jahaan se zara sa dhundlapan shuru ho, wohi aapki duri hai.

Iss duri, aankh aur panne (ya screen) ke beech, ko maaplein centimeters mein.

Abb taiyaar hojaiye uss baat ko jaane ke liye jisse main bhi dung reh gaya jab mujhe pehle pata chali.

Diopter (woh number jo aapke chashme ka power batata hai) woh sirf ek maatra hai inverse meters ko maapne ka. Samjhe? Diopter batata hai vishesh taur se duri (woh duri jo aapne maapi hai apni aankh se dhundlepan tak). Haan yeh itna aasaan hai, jaise kaafi aur aisi cheezein jo aap mujhse aage seekheinge. Jitni duri tak aap dekh sakte hain, dhundlapan shuru hone se pehle, uska seedha rishta hai aapke diopter se, jo aapko “uttam” duri ki drishti deta hai.

Goom gaye? Udaharan deta hoon:

Maante hain aapke chashme -4.50 diopters ke hain. Yeh number mila aapke optometrist se, jab aap kursi pe baithe, kam roshni mein, badi hi-fi machine ke beech. Wahan,aapko laga hoga khudka number khudse pata karna naamumkin ke barabar. Par abb aapko lag raha hoga ki -4.50 diopters ek aur tareeka hai bolne ka “22 centimeters dhundlapan shuru hone se pehle.”

Iska matlab hai jo shabd aap panne par dekh rahe hain woh agar zarasa bhi dhundla hota hai 22 centimeters par, toh phir aapko -4.50 diopters ki zarurat hai eye chart ko 20/20 ki line ke neeche dekhne ke liye.

Bas. Itna hi. Kuch pechida nahi. Sochiye iss baare mein ek pal.

Aapki madat ke liye, centimeters se diopters convert karne mein, maine ek suvidhaajanak calculator banaya hai. Link dene se pehle, ek chetavni: aapke ank aapko shaayad chauka dein. Aapka number, optometrist ke diye jaane number se alag ho.

Yahan aap apne centimeters ko diopters mein badal sakte hain, mere calculator ka upyog karke.

Yeh sab aapke liye kaam karega agar aapko saadharan kisam ka myopia hua hai (aankh ki thakaan aur stimulus ke kaaran). Agar aapko ophthalmologist ne bola hai kuch gambhir hai—jaise koi aankh ki bimaari—toh phir woh ek alag hi vishay hai aur doctor ki salah leni chahiye.

Aap shaayad soch rahe honge ki ruler, optometrist ke badi machino ki tarah kaam karta hai par parinaam alag kaise. Baat seedhi hai, optometrist ne jyaada karke aapko jyaada diopters diye hain, jiski aapko zarurat nahi hai adhik samay. Aapki drishti ko maapa gaya ek kam roshni wale kamre mein aur aapko diya gaya zyada se zyada number. Unhone yeh nahi socha ki aapki drishti din bhar badalti rehti hai. Aapko pichle chashme kab mile aur kya aapki aankhein uss samay mein badli, iss par bhi nirbhar karta hai.

Yeh sab samajh mein aane lagega jab aap khud maapne lageinge aur aanewali e-mails padheinge.

Yeh pehle ke kadmon mein ek hai. Yeh thos kadam utha liya toh aap majboor hojayenge apni drishti wapas pane ke liye. Aur yeh dekhne ke liye ki aap iss raste par chalte hain, main aapko zara homework doonga:

Apni baen aur daayni aankh maapein. Subah mein karein, kaam shuru karne se pehle, screen ke samne. Phir doharayein dopahar ko aur ek baar shaam mein.

Ank likhna naa bhoolein. Aapko kal iski zarurat padegi (jab main aapko bataunga woh ank aapki drishti ka bhavishya kaise batayenge).

Neeche udharan hai aapke ank kaise hone chahiye:

Subah: Baen: 22 cm; Daayen: 26 cm

Dopahar: Baen: 21 cm; Daayen: 25 cm

Shaam: Baen: 19 cm; Daayen: 22 cm

Yaad rakhiye yeh sirf udharan hai, aur ank kitna badalte hain kaafi kuch batata hai ki aap apni aankhein kaise istamaal kar rahe hain aur pareshaniyaan kahan hai.

Aur astigmatism maapne ka saadhan maine aapko pehle hi dediya hai (Din 1 e-mail). Yeh dono upkaran ke saath, aap sahi raste par nikal chuke hain, apni aankhon aur diopter ki zaruraton ko samajhne.

Par uss baare mein kal kareinge baat-cheet.

Cheers,

– Jake Steiner

[Din 4/7] Centimeter Numbers Samajhna

Hi,

(Nahi dekhi kal ki e-mail, “Aankhein Theek Karein? Pehle, Aapka Myopia Maapte Hain.” Yahaan padh sakte hain.)

Kal maine aapko kuch homework diya tha, toh phir abhi aapke paas aise kai numbers honge jiske saath kya karna, aapko koi jaankaari nahi. Pehle, mujhe aapko bata dena chahiye ki yeh numbers bahut mahatvapoorn hain. Yeh lagbhag sab kuch batate hain eye strain ke baare, aapko kahaan apni aadatein badalni padengi, aur kitna lens correction ki avashyakta hai aapki aankhon ko, achha mehsus karne ke liye. Prabhaavshaali gyaan chupa hai inn numbers ke peeche.

Yeh ek jald tareeka numbers samajhne ke liye:

Pehli baat: aapke paas din, dopahar aur shaam ke numbers hain. Yeh aapko alag alag duriyaan bataa rahe hain. Yaad kijiye dusri e-mail, jisme maine aapse kaaha tha ki aapki roshni eksamaan nahi rahegi din bhar. Kaash main iss line ko aur bold kar sakta. Waapas padhiye! Roshni—eksamaan nahi. Aapki aankhon ki drishti din bhar badalti hai, jahaan tak myopia ki “maatra” ka sawaal hai.

Kya chal raha hai yahaan?

Theek hai, main optometrist ko doshi nahi theraunga, par aapki drishti ka maap jo andhere kamre mein liya gaya tha, woh galat tha. Ek aasaan “tod” tha aapko utna jyaada correction dena jitna aap sehan kar sakte the. Badhiya vichaar nahi, par phir burger joint ka khaana bhi toh badiya vichaar nahi hota.

Par abb wapas laute hain unn numbers ke paas. Jis tareeke se woh numbers badalte hain, unhi se pata lagega ki kya strain hai jisse aankhein bigadti jaa rahi hain. Ek udaaharan se samajhte hain, aur iske liye…mera udaaharan hi le lete hain.

Main bhi kaafi myopic hua karta tha. Mere paas mere purane measurement records hai (waise, record karte rahein, lambe samay mein kaafi kaam aate hain). Ye hai 2005 ki ek subah ka:

L: 32 cm; R: 36 cm

Agar aap mera calculator istamaal karte hain, toh aapko yeh diopters milenge: -3 aur -2.75. Kya aap anumaan laga sakte hain ki mera prescription kya tha uss samay (haan, record zarur rakhein!)? -2.75 dono aankhon ke liye.

Lagbhag sahi, par samay aagaya tha 0.25 kam karne ka. Abb aapko shayad yaad hoga ki main -4.00 ke chashme pehna karta tha, toh main seedhe track par tha kam prescription panne ke liye. Aur meri pragati vaastav mein behtar thi, naki jitni lag rahi thi. Woh -4.00 ka prescription jab maine yeh raasta chuna? Woh kaafi kam tha, kareeb 0.75 diopters se.

Main aapko yeh sab kyun bata raha hoon? Kyunki, aapko sabse jaruri cheez jo samajhni hai woh hai ki aapka prescription saapeksh hai. Aapko apni aankhon ko samajhna hai aur kitne prescription ki unko zarurat hai. Par abhi ke liye, mere numbers ki aur waapas chaltein hain.

Mere subah ke measurements the L: 32 cm aur R: 36 cm.

Dopahar tak, mere measurements the L: 30 cm aur R: 35 cm.

Number kam hote gaye. Iska kya matlab hai? Ki main subah mein zyaada dur dekh sakta tha, aur dopahar tak utni duri nahi. Ajeeb, hai na? Aur aap bhi yeh mehsus kar rahe honge; yeh kafi saadharan baat hai centimeter curve (haan yeh sab mere dwaara hi banaye gaye shabd hain, mainstream wallon ko chasme bechne se fursat kahan).

Shaam mein mere measurements the L: 28 cm aur R: 32 cm.

Ouch! 28 cm matlab -3.50 ka prescription. Main aadha diopter upar chala gaya, -3.00 se -3.50, ek hi din mein. Bahut kharab! Par aap kya anumaan laga sakte hain ki agli subah mera measurement kitna tha? Wapas 32 cm hogaya tha. Kya chal raha tha?

Yeh eye strain tha. Yaad hai ciliary (focusing) muscle? Din ke aakhir mein yeh khush nahi rehta. Woh “attak” jaata hai close-up mode mein, aur iska drishti par asar padta hai. Par raat mein, jab aap so jaate hain, ciliary muscle relax hojata hai, aur phir agli subah, woh kaam karne lagta hai, pehle jaise.

Yeh padhke aapki aankhein aur khul jayengi. Aapki aankhon ke andar bahut kuch chal raha hai, aur Jake ki madat se aap nishpaksh tareekse diopters maapna seekh lenge. Aap jaan lenge numbers ke dwara kitna eye strain hai. Yeh shaktishalee cheez hai.

Abb jab aap yeh jaan gaye hain, abb kya karna hoga aapko?

Maapte rehna hoga. Ek reminder bana lijiye, din mein kai baar maapne ke liye, aanewale kuch hafton tak. Isse aapko malum padega aapki drishti kaise kaam karti hai jab aap koi paas ka kaam nahi karte, unn dinon jab aap exercise karte hain, aise dinn jab aap baahar roshni mein samay bitate hain, ityaadi. Aap tulna karein drishti ka achhi roshni mein aur gandi fluorescent lighting mein. Numbers likhte rahein! Aage kaam mein ayenge.

Padhiye. Jitna aap seekheinge, utna acha hoga aapke liye. Ek baar this page on successful natural myopia control , iss ko padhein!

–> Kal hum baat kareinge bhayankar axial elongation par , jisse aap kisi bhi tarah se bachna chahte hain. Isme chupi hai badte hue myopia ki pahelee, aur yahi woh cheez hai jisse kai prakaar ki retinal samasyaein jagrut hoti hain, lambe samay mein. Aap apni aankhon ke saath jo sabse buri cheez kar rahe hain, uski bhi jaankari dunga—yeh ek cheez jo aapko sach mein kabhi bhi apni aankhon ke saath nahi karni chahiye. Zaroor padhein.

Kal milte hain!

Cheers,

– Jake Steiner

[Din 5/7] Myopia Progression: Ek Cheez Jo Aapko Band Karni Hi Padegi

Hi,

(Nahi dekhi kal ki e-mail, “Centimeter Numbers Samajhna”? Yahaan padh sakte hain.)

Bahut bada khulasa karne se pehle, jiske baare maine kal baat ki thi—ek cheez jo aap apni aankhon ke saath nahi karna chahte—uske pehle hume wapas axial elongation ki aur jaana padega. Pata hai, main bahut bura hoon. Par banne rahiye. Aapko samajhna hoga ki yeh ek cheez itni kharaab kyun hai.

Axial elongation hota hai “hyperopic defocus” ke kaaran. Aapko zarurat se zyaada number diya jaata hai (andhere kamre mein, jyaada se jyaada prescription dete hain, jo bahar suraj ki roshni mein bahut strong hota hai, har roz ke kaam ke liye) aur aap apne yehi chashme kaafi samay pehene rakhte hain. Yeh aapki aankhon ke liye bilkul achha nahi hai.

Agar aap sahi correction pehen rahe hote duri par dekhne ke liye, bina koi focusing muscle spasm ke, aapke chashme aapka myopia nahi badhate. Par aisa bahut kam hota hai, isliye neeche ka yeh vigyaan:

“Agar aankh ki lambayi kam badhti hai focal length ki tulana mein, focal length retina ke peeche aata hai, jisse retina pe hyperopic defocus hota hai. Yeh hi cheez hoti hai jab koi negative lens aankh ke saamne lagata hai.

Tez drishti paane ke liye, retina ko peeche jaana padta hai, jahaan pe image pad rahi hai. Yeh do tarah se hota hai: aankh ka aakaar lamba hone lagta hai jaise jaise rate of growth badti hai yaa sclera ke remodelling se joh hai stith aankh ke posterior pole mein (Gentle and McBrien, 1999; Nickla et al., 1997), aur retina aankh ke andar kheecha jata hai choroid ke thinning hone se, jo hai vascular layer retina aur sclera ke beech (Figure 2B; Wallman et al., 1995; Wildsoet and Wallman, 1995); ek baar wapas duri ki drishti wali images retina par focus hoti hain (emmetropia), aur ek baar phirse rate of ocular elongation aur choroid thickness normal hojate hain.”

Yeh tarah ki jaankaari mere 80% clients ko sula deti hai aur baaki 20% ko jaga deti hai.

Agar aap unn 20% mein se hain, toh badte hue myopia vigyaan aur studies section of the blog ki aur nazar daalein.

Ek chetaavni—kaafi gehariya mein articles jaate hain. Isliye yeh optional reading hai.

Wapas axial elongation par chalte hain. Maine aapko bataya tha ki yeh bada vishay hai. Lambi aakaar wala eyeball ka matlab hai jyaada myopia, aur isse kai aur samasyaein paida hoti hain. (Agar aap vichaar kar rahe hain toh, 3 diopters matlab 1 millimeter ki eyeball growth.) Ab tak aap samajh gaye honge ki yeh badta hua eyeball, lens ki wajah se, acchi baat nahi. Issi prakaar aapki aankhon ko prescriptions ki “lat” lag jaati hai.

Yahaan main ek cheez bolna chahta hoon ki sab optometrists bure nahi hote. Haan yeh sach hai ki kaafi saare aapko strong chashme de dete hain aur har saal aur bada number lagane ko kehte hain, woh yeh sab kar rahein hain kyunki zyaada tar logon ko yahi chahiye: ekdum se saaf drishti.

Aise bhi kaafi saare opticians hain jo aapko dusre options batate hain. Aapko yeh shaayad sasti chain store optic shops mein naa milein, par woh hain kahin pe. Unke paas mere jaisa prabhaavshaali tareeka nahi ho, par kuch hadd tak jaankaari hogi. Woh aapko utna hi correction denge jitne ki aapko zarurat hai. Aur agar aapko aage ka sochne wala optometrist mil gaya, toh woh aapko computer use ke liye kam diopter ka chashma bhi bana de. (Agar aapko aisa koi mil jaaye, toh pakad ke rakhna usse; itni aasaani se nahi milte aur apni taraf ho, toh kya baat hai!)

Chalo wapas chalte hain bade khulase ke paas. Abb tak ka itna sab padh ke, kya aap anumaan laga sakte hain ki woh kya hai?

Sabse badi galti jo aap kar sakte hain, aur jo aap nahi karna chahenge, kabhi bhi, woh hai apna chashma jo duri par dekhne ke liye hai, uska prayog karna jab aap screen ke saamne baithe hain, jo hai 60 cm aapki aankh se.

Yeh sabse haanikarak cheez hai jo aap apni aankhon ke saath kar rahe hain.

Yaad hai humne baat ki thi ki aankh apna aakar badalti hai, woh aadharit hai jo aap dekhte hain uss par. Yahi woh stimulus hai jo batata hai kaunsi aankh myopic hai aur kaunsi theek. Yeh woh akeli cheez hai jo aapki drishti theek kar sakti hai, jo myopia ko rok sakti hai, stimulus samajhna aur uske baad niyantran laana. Stimulus, ek line mein, jahaan roshni girti hai aapki aankh ke andar.

Chashme sirf ciliary muscle spasm ka “ilaaj” karte hain usko nazar andaz karke, focal plane badalne wale lenses ki madat se. Chashme pehne se samasya sirf kuch samay ke liye door hojati hai, par ant mein yeh sab kuch aur bigaad deti hai.

Agar yeh sab sunn ke aapko chakkar aa raha hai, toh website par jaake yeh link dekhein “how myopia happens”. Jab aap yeh samajh jayeinge, aankhon ko theek karna aasaan lagega. Mere clients jo 80s, 90s mein hain, unhone bhi apni aankhein theek ki. Yeh koi rocket science nahi.

Abb yahan se kahaan jaana hai?

Pehli cheez: Chashmon ka prayog karna band mat karna. Iss mein koi faayda nahi. Aapko chasme pehene chahiye duri par dekhne ke liye. Aapko sirf inn chashmon ko paas ke kaam ke liye nahi upayog karna hai. Yeh focal plane change bahut zyaada hota hai aur iss se axial elongation shuru hota hai.

Agar aapka aajka prescription -2.00 diopters se kam hai, toh aapko chashme paas ke kaam ke liye band kar dene chahiye, abhi se.

Agar aapka aajka prescription -2.00 diopters se zyaada hai (aasaan hai pata karna: agar aap apna screen nahi dekh sakte, aur aapke centimeter results se), toh phir aapko kam number wala prescription chahiye paas ke kaam karte samay.

Ek tareeka jisse aap yeh “test” kar sakte hain agar aap contact lenses pehente hain.

Aap reading glasses khareed sakte hain. Yeh hai farsighted aankhon ke liye, jo myopia ka ulta hota hai. Yeh “plus” lenses hoti hain. Ek diopter plus lens ka ek diopter minus lens ko radd karta hai. Yeh experiment aap dukaan mein kar sakte hain. Koi bhi magazine lein aur ek +1.50 se dekhein ki aankhon se kitna dur rakh saktein hai aur kitna padh sakte hain dhundlepan ke bina. Shaayad aapko +2.00, ya +1.00 ki zarurat padegi. Sab nirbhar hai aap zyada karke kitni duri par dekhte hain aur agar aap over ya under prescribed hain.

Aap phir yeh plus lenses apne contact lenses ke upar pehen sakte hain kaam karte samay aur kam focal plane change ka mazaa utha sakte hain. Aap yeh behtaar mehsus kar payenge jab aap full minus correction band kar denge paas ke kaam karte samay.

Pehle shaayad ajeeb lage (behtar hai agar sabse sastaa plus lens nahi khareedein –kharaab lens quality zara “vichitr” lag sakti hai). Inhe theek tareeke se pehene jab aap yeh close-up kaam ke liye shuru karte hain aur close-up kaam kam samay ke liye karein. Aapki drishti kaafi hadd tak aapke visual cortex mein hoti hai. Woh jagah zyaada focal plane changes nahi sambhaal sakti, aur zara waqt lag sakta hai adjust hone mein.

Achha vichar hoga agar aap yeh chutti ke din par karein aur apne aapko kuch samay dein.

Main aapko yeh bataa sakta hoon: agar aap apna full minus prescription paas ke kaam ke liye nahi pehente char hafton ke liye, aur uske baad pehente hai, toh aapko ulti aayegi. Aapko chakkar aane lagenge aur aap bimaar mehsus karenge agar aap wohi chashme ek din pehenge paas ke kaam ke liye, ek mahine baad.

Kyun? Aasaan hai, aapka brain (visual cortex) minus ko reject kar dega.

Aaj aap isko bardaash kar paa rahein hain kyun saalon se aapko aadat hogayi hai. Bahut buri cheez hai aapki aankhon ke liye, aur agar aap “detox” karte hain full minus se close-up kaam ke samay, ek mahine ke liye, toh aapko pata chal jayega main kya bol raha hoon.

Toh abb kya? Kaafi kuch hai seekhne ke liye abhi bhi, par aaj ke liye itna hi, maariyega nahi mujhe agar main kahoon “kal tak ke liye.”

–> Kal, kya karna hai aur kya bilkul nahi karna, padhte samay ya computer screen use karte waqt. Aur haan, main aapko thos cheezein bataunga!

Kal baat karte hai phir. :wink:

– Jake Steiner

[Din 6/7] Differential Glasses CLOSE-UP Kaam Ke Liye

Hi,

(Nahi dekhi kal ki e-mail, “Myopia Progression: Ek Cheez Jo Aapko Band Karni Hi Padegi”. Yahaan padh sakte hain.)

Hum programme ke ant mein pahunch rahein hain. Aaj ke baad sirf ek e-mail aur baaki hai. Yahaan tak pahunchne ke liye, mein aapko zara sa mental break dunga. Chinta mat kijiye—aap phir bhi apni drishti ke baare kaafi kuch seekheinge.

Yaad hai maine aapko aapki drishti ka maap kaafi baar din mein karne ko kaha tha? Maine aapko trends par dhyaan dene ko kaha tha aur yeh bhi bataya tha ki woh numbers baad mein jaake kaam aayenge. Abb tak aapke paas bahut numbers nahi honge, par main aapko ek choti jhalak dena chahta hoon ki woh numbers aapki drishti ke baare mein kya keh sakte hain.

Aap iska print out lena chahenge ya save kar sakte hain aage ke liye. Kaafi kuch jaankaari ho sakti hai ek baar ke liye!

“Kharaab” roshni jaisi cheez hai.

Jaise kharaab quality ka khana aur hawa hote hain, waise hi achhi roshni aur kharaab roshni bhi hoti hai. Roshni ka bada prabhav hota hai aapki drishti (aur brain par bhi). Ek recent study ne safalta ke saath amnesia reverse kiya blue light ka prayog karke (aap isse website ke science section pe paa sakte hain). Aapko roshni ki quality par dhyaan dena padega.

Achhi roshni natural light hai (full-spectrum UV), jisse dekhne ke liye aapki aankh bani hai. Agar aap kaam karte samay khidki ke paas beth sakte hain, jahan natural ambient light hai, toh aadha kaam hogaya.

Agar aap yeh nahi kar sakte, aap full-spectrum UV bulb khareedna chahenge apne desk lamp mein lagane ke liye. Yeh zyaada achhi hai fluorescent office lights se.

Kharaab quality screens aapki aankhon ke liye buri hain.

Purani CRTs (cathode ray tubes) se dur rahein, aur screens jinke low refresh rate hain, low resolution screens, aur zyaada roshni ya bahut kam roshni wali screens se bhi. Aapko pata chal jayega aap sahi disha mein jaa rahein hain jab aapka sardard band hojayega, jab aap apne close-up vaataavaran mein parivartan laayenge.

Ek seema hai close-up time karne tak jiske baad aapka ciliary “lock up” hojayega.

Apne centimeter maap mein antar dekhein ek ghanta close-up kaam karne ke baad aur paanch ghanta close-up kaam karne ke baad. Dang reh jayenge nateeja dekhkar.

Teen ghante adhiktam samay hai close-up kaam karne ke liye. Iske baad aapko ek ghanta ka break lena chahiye, jisse duri par dekhne ka koi kaam karna pade. Koi smartphones, koi kitabe nahi. Jab aapke measurements ek centimeter se bhi girte hain (jaldi dhundlapan lagne lagta hai), tab samaj lena chahiye ki aankhon par kaafi dabaav padh raha hai.

Insulin spikes aapki aankhon ke liye achhe nahi hain.

Woh pasta ki badi plate aur woh do Cokes aapki aankhon ke liye haanikaarak hain. Itne bure nahi jitne galat lenses aur close-up time, par agar aap badlaav laa rahe hain, toh yeh jaankaari bhi avashak hai.

Ek weekend screens aur kitabon se dur kaafi farak dikhlata hai.

Sirf do din jungle ya beach pe, ya doston ke saath baate karte bitana aur bike chalate, centimeter measurement mein dikhta hai. Sochiye agar aap sara samay aise hi bitate.

Yeh kaafi saari jaankaari hai ek waqt ke liye. Par wapas kehta hoon, sirf mere upar yakeen mat kariye. Apne upar jaanch karke dekhiye pata karne ke liye ki main sach bol raha hoon! Yeh sab pata chal sakta hai aapki har roz ki measurements se bhi.

Jaane se pehle, ek aakhri cheez apke measurements ke baare. BackTo20/20, jo ek structured, guided course hai jisme main aapko apna personal support deta hoon aur full access forum ke liye, batata hai ekdum sahi tarah se aapke centimeter measurements se aapko kaunse chashme sahi padenge. Woh batlata hai agar aap galat chashme pehen rahe hain aur aapka number kitna hona chahiye duri par dekhne ke liye aur paas ke kaam ke liye bhi.

Aur haan mujhe yaad hai mera vaada, aapko samadhaan batana aapke close-up zaruraton ke liye: Apna distance ka number lijiye aur usse 1.5 diopters kam kijiye. (Pehle yeh koshish kijiye agar kaam karta hai—koi dayaloo optometrist ki madat ke saath.) Aur kuch mat kijiye; yeh baen aur dayean aankh ke liye samanya kariye. Agar astigmatism 0.50 diopters tak hai, toh isse nikaal dijiye number se, aur 1.5 diopters total nikaalne ke bajaiye, sirf 1.25 nikaliye. Agar astigmatism 0.25 hai, toh sirf usse nikaal dijiye, aur koi badlav ke bina.

Yeh sab karne se pehle, kuch samay bitaye padhne mein yeh lenses and diopter section website par!

Bas itna hi! Asha karta hoon ke yeh saptaah aapko faydemand laga ho. Maine puri koshish ki aapko sabse jaruri cheezein bataoon.

Cheers!

-Jake Steiner

[Din 7/7] Active Focus: Ek Mukhiya Kadi Behtar Drishti Ke Liye

Hi kaise hain,

Aakhri din!

(Nahi dekhi kal ki e-mail, “Differential Glasses CLOSE-UP Kaam Ke Liye”? Yahaan padh sakte hain.)

Hairaan kardene wali baat hai ki aap apni drishti ke baare zyaada jante hain ek saptaah pehle se. Pehli baat toh, aap jante hain aapki aankh kaise kaam karti hai aur myopia shuru kaise hota hai. Aap apni drishti ka maap lena bhi jaante hain. Aap itna bhi jaante hain ki drishti ko kaise sudharein—sabse mahatvapoorn baat, dur ke chashme paas ke kaam ke liye nahi pehnne.

Maine toh abb tak aapko sabse badhiya baat bhi nahi batayi. Abhi bhi kaafi kuch hai seekhne ke liye, jaise ke jaagruk niyantran laana apne ciliary (focusing) muscle par.

Kya aapko pata bhi tha ki aap apne focus pe niyantran laa sakte hain jab aap chahte hain? Theek sunna, maine kahaa “jab aap chahte hain.” Isse main “active focus” bulata hoon, jisse bahut sara stimulus milta hai drishti sudharne mein. Yeh aap khudse kar sakte hain jab aap chahein. Aapko baar baar karne wali eye exercises bhi nahi karni padengi; aapko sirf badhti hui drishti nazar aayegi.

–> Maine active focus link list review & guide summary page par daala hai, kaafi aur how-to guides aur tareekon ke saath.

Humne ab tak yeh bhi baat nahi ki kaise ek dayaalu optometrist ko dhoondna jo aapko chashme de kam keemat mein—aur optometrist ki madaat ke bina bhi yeh kaise khareedna.

Par aaj aakhri din hai, toh aap soch rahe honge ki itna sab main ek e-mail mein kaise bharoonga. Toh, uska jawaab hai ki main aisa nahi kar sakunga. Aur yahaan aati hai website aur BackTo20/20 program.

Yaad rakhiye, aap yeh sab kuch apne aap kar sakte hain sirf blog ki madat ke saath. Aapko mere se kuch khareedne ki zarurat nahi; main apne method ko chupa ke nahi rakh raha. Saari blog shreniyaan dekhiye, iss mein ek puri how-to category hai, ek diopter category hai, anginat vistrt pragati reports, ek astigmatism category, ek child myopia category, aur yeh list chalti jaati hai. Maine hazaaron ghante lagaye hain blog mein isliye ki aapko uttar mile.

Upar diya gaya link dekhein jyaada jaankari ke liye, apni yatra shuru karte samay.

Aur kal main aapko BackTo20/20 invite links bhejoonga. Agar aapko nahi milta hai, toh iska matlab ke saare spots bhar gaye hain. BackTo20/20 jaldi bhar jaata hai—sachh mein—toh agar aap taiyaar hain, jaldi se sign-up kar lijiye agar/ jaise hi aapko invite aata hai.

Yaad rakhiye ki aap yeh khudse bhi kar sakte hain blog ki madat lekar, main apna tareeka bilkul hi nahi chupa raha. Maine programme isliye shuru kiya kyunki bahut saare shishya ek structured approach aur mere se personal support maang rahe the. Har koi mujhse khushi-khushi sawaal puchta rahega din bhar jab tak sab kuch free hai, lekin jab unko pata chalta hai mere samay ki bhi kimat hai, toh kaafi log apne aap karna chahte hain aur kuch log member banna pasand kartein hain.

Mujhe progress updates aur aapke anubhav bahut achhe lagte hain … toh agar yeh guide aapko aapki natural 20/20 drishti paane mein madat karti hai, toh yaadse mujhe ek e-mail zarur likhein aur batayein sab kaisa chal raha hai!

Cheers,

– Jake Steiner